ಸುಸ್ಥಿರ ಜಲಚರ ಸಾಕಣೆಯು ಪರಿಸರ ಸಮತೋಲನವನ್ನು ಖಚಿತಪಡಿಸುವ, ಪರಿಸರ ಸಂರಕ್ಷಣೆಯನ್ನು ಬಲಪಡಿಸುವ ಮತ್ತು ಸಮುದಾಯ-ಚಾಲಿತ ಸುಸ್ಥಿರ ಕೃಷಿ ಪರಿವರ್ತನೆಯನ್ನು ತರಬಲ್ಲ ಅಭ್ಯಾಸಗಳನ್ನು ಒಳಗೊಂಡಿದೆ. ಸುಸ್ಥಿರ ಜಲಚರ ಸಾಕಣೆಯನ್ನು ತನ್ನ ಪ್ರಮುಖ ಉಪಕ್ರಮವಾಗಿ ಹೊಂದಿರುವ SAFAL, ಅಸ್ಸಾಂ ಮತ್ತು ಒರಿಸ್ಸಾದಲ್ಲಿ 7000 ಮೀನು ಸಾಕಣೆದಾರರ ಜೀವನೋಪಾಯವನ್ನು ಹೆಚ್ಚಿಸಿ ಸಬಲರನ್ನಾಗಿಸಿದೆ.
ಗ್ರಾಮೀಣ ಭಾರತದಲ್ಲಿ, ಆಹಾರ ಮತ್ತು ಪೌಷ್ಟಿಕಾಂಶ ಭದ್ರತೆಯನ್ನು ಹೆಚ್ಚಿಸಲು ಮತ್ತು ರೈತರ ಆದಾಯವನ್ನು ಹೆಚ್ಚಿಸಲು ಜಲಚರ ಸಾಕಣೆ ಸುಸ್ಥಿರ ಸಾಧನವಾಗಿ ಹೊರಹೊಮ್ಮುತ್ತಿದೆ. ಸಂಪನ್ಮೂಲ-ಸಮರ್ಥ ಮೀನು ಸಾಕಣೆ ವಿಧಾನಗಳನ್ನು ಅಳವಡಿಸಿಕೊಳ್ಳಲು ಸಣ್ಣ ಪ್ರಮಾಣದ ಮೀನು ಸಾಕಣೆದಾರರಿಗೆ ಜ್ಞಾನ ಮತ್ತು ಕೌಶಲ್ಯಗಳನ್ನು ನೀಡುವ ಸಲುವಾಗಿ, ಸ್ಥಳೀಯವಾಗಿ ಆಹಾರ ಮತ್ತು ಜೀವನೋಪಾಯಕ್ಕಾಗಿ ಸುಸ್ಥಿರ ಜಲಚರ ಸಾಕಣೆ (SAFAL) ಎಂದು ಕರೆಯಲ್ಪಡುವ ಸಮಗ್ರ ಜಲಚರ ಸಾಕಣೆ (EIAA) ಯೋಜನೆಯ ಮೂಲಕ ಆಹಾರ ಭದ್ರತೆಯನ್ನು ಜಾರಿಗೆ ತರಲಾಯಿತು. ಜರ್ಮನ್ ಫೆಡರಲ್ ಆರ್ಥಿಕ ಸಹಕಾರ ಮತ್ತು ಅಭಿವೃದ್ಧಿ ಸಚಿವಾಲಯ (BMZ) ನಿಂದ ಧನಸಹಾಯ ಪಡೆದ SAFAL ಅನ್ನು ಭಾರತ ಸರ್ಕಾರದ ಮೀನುಗಾರಿಕೆ, ಪಶುಸಂಗೋಪನೆ ಮತ್ತು ಹೈನುಗಾರಿಕೆ ಸಚಿವಾಲಯ (MoFAHD) ದ ಸಹಕಾರದೊಂದಿಗೆ ಡಾಯ್ಚ ಗೆಸೆಲ್ಸ್‌ಚಾಫ್ಟ್ (GIZ) GmbH ಜಾರಿಗೆ ತಂದಿದೆ. ಅಸ್ಸಾಂ ಮತ್ತು ಒರಿಸ್ಸಾದ ಮೀನುಗಾರಿಕೆ ಇಲಾಖೆಗಳೊಂದಿಗೆ (DoFs) ಕೆಲಸ ಮಾಡುತ್ತಿರುವ ಈ ಯೋಜನೆಯು, ಅಸ್ಸಾಂನ 12 ಜಿಲ್ಲೆಗಳು ಮತ್ತು ಒರಿಸ್ಸಾದ 5 ಜಿಲ್ಲೆಗಳಲ್ಲಿ 7,000 ಕ್ಕೂ ಹೆಚ್ಚು ಮೀನು ಸಾಕಣೆದಾರರಿಗೆ ತರಬೇತಿ ನೀಡಿದೆ, ಗ್ರಾಮೀಣ ಆರ್ಥಿಕತೆಯನ್ನು ಬಲಪಡಿಸುತ್ತದೆ ಮತ್ತು ಸುಸ್ಥಿರ ಜಲಚರ ಸಾಕಣೆ ಪದ್ಧತಿಗಳನ್ನು ಬೆಳೆಸುತ್ತದೆ.
ಚೌಕ 1: ಸೋನ್ಮೋನಿ ದೇವಿಯ ಯಶೋಗಾಥೆ
ಅಸ್ಸಾಂನ ಬ್ರಹ್ಮಪುತ್ರ ನದಿಯ ದಕ್ಷಿಣ ದಂಡೆಯಲ್ಲಿರುವ ಡೊರೊಂಗಿ ಗ್ರಾಮದ ರೈತರಾದ ಸೋನ್ಮೋನಿ ದೇವಿ, ಒಂದು ವರ್ಷದೊಳಗೆ ತಮ್ಮ ಮೀನು ಕೊಯ್ಲಿನಿಂದ ಗಮನಾರ್ಹವಾಗಿ ಹೆಚ್ಚಿನ ಲಾಭ ಪಡೆದಿದ್ದಾರೆ. SAFAL ಯೋಜನೆಯಡಿಯಲ್ಲಿ ವೈಜ್ಞಾನಿಕ ಜಲಚರ ಸಾಕಣೆ ಪದ್ಧತಿಗಳಲ್ಲಿ ತರಬೇತಿ ಪಡೆದ ನಂತರ ಈ ಬೆಳವಣಿಗೆ ಕಂಡುಬಂದಿದೆ. 2022 ಕ್ಕಿಂತ ಮೊದಲು, ಸೋನ್ಮೋನಿ ಪ್ರಾಥಮಿಕವಾಗಿ ಸಾಂಪ್ರದಾಯಿಕ ಜಲಚರ ಸಾಕಣೆಯನ್ನು ಅವಲಂಬಿಸಿದ್ದರು. ಮೀನು ಸಾಕಣೆ ಮನೆಯ ಬಳಕೆಗೆ ಸೀಮಿತವಾಗಿತ್ತು. ವೈಜ್ಞಾನಿಕ ಜ್ಞಾನ ಮತ್ತು ಸಂಪನ್ಮೂಲಗಳ ಲಭ್ಯತೆಯಿಲ್ಲದೆ, ಉತ್ಪಾದಕತೆ ಕಡಿಮೆಯಾಗಿತ್ತು. ಸುಸ್ಥಿರ ಜಲಚರ ಸಾಕಣೆಯ ತರಬೇತಿಗಳಲ್ಲಿ ಭಾಗವಹಿಸಿದ ನಂತರ, ಅವರು ಸಂಗ್ರಹ ಸಾಂದ್ರತೆಯನ್ನು ಅತ್ಯುತ್ತಮವಾಗಿಸಲು, ಮೇವಿನ ಗುಣಮಟ್ಟವನ್ನು ಸುಧಾರಿಸಲು ಮತ್ತು ಕೊಳದ ಪರಿಸರ ವ್ಯವಸ್ಥೆಗಳನ್ನು ಪರಿಣಾಮಕಾರಿಯಾಗಿ ನಿರ್ವಹಿಸಲು ಕಲಿತರು. "ತರಬೇತಿಗೆ ಮುನ್ನ, 0.06 ಹೆಕ್ಟೇರ್ ಕೊಳದಲ್ಲಿ 2,000 ಮೀನು ಮರಿಗಳನ್ನು ಸಂಗ್ರಹಿಸಿದ್ದೆ. ಆದರೆ ಪ್ರತಿ ವರ್ಷ 400 ಮೀನು ಮರಿಗಳು ಹೆಚ್ಚುವರಿಯಾಗಿ ಸಾಯುತ್ತಿದ್ದವು. ಮೀನುಗಳ ಆಹಾರಕ್ಕಾಗಿ ಅಕ್ಕಿ ಹೊಟ್ಟು ಮತ್ತು ಉಳಿದ ಆಹಾರವನ್ನು ಅವಲಂಬಿಸಿದ್ದೆ. ಇದರಿಂದ ಮೀನುಗಳ ಬೆಳವಣಿಗೆ ಕುಂಠಿತಗೊಂಡಿತ್ತು. ಈಗ, ಕೊಳದ ಪರಿಸರ ವ್ಯವಸ್ಥೆಯನ್ನು ಕಾಪಾಡಿಕೊಳ್ಳುವುದು, ಪ್ಲಾಂಕ್ಟನ್ ಬೆಳವಣಿಗೆಯನ್ನು ಖಚಿತಪಡಿಸಿಕೊಳ್ಳುವುದು ಮತ್ತು ಸಮತೋಲಿತ ಪೋಷಣೆಯನ್ನು ಬಳಸುವ ಪ್ರಾಮುಖ್ಯತೆಯನ್ನು ಅರ್ಥಮಾಡಿಕೊಂಡಿದ್ದೇನೆ," ಎಂದು ಸೊನ್ಮೋನಿ ವಿವರಿಸುತ್ತಾರೆ. ಸುಸ್ಥಿರ ಮೀನು ಸಾಕಣೆ ಮತ್ತು ಆಹಾರ ತಂತ್ರಗಳ ಕುರಿತು ತಮ್ಮ ಹೊಸ ಜ್ಞಾನದೊಂದಿಗೆ, ವಾಣಿಜ್ಯ ಮೀನು ಸಾಕಣೆಗಾಗಿ ಹೆಚ್ಚುವರಿ ಕೊಳವನ್ನು ಗುತ್ತಿಗೆಗೆ ತೆಗೆದುಕೊಳ್ಳುವ ಮೂಲಕ ತಮ್ಮ ಕಾರ್ಯಾಚರಣೆಗಳನ್ನು ವಿಸ್ತರಿಸಿದರು. 2023-2024ರ ಅವಧಿಯಲ್ಲಿ, ಮೀನು ಉತ್ಪಾದನೆಯನ್ನು 150 ಕೆಜಿಯಿಂದ 200 ಕೆಜಿಗೆ ಹೆಚ್ಚಿಸಿಕೊಂಡರು. ಇದರಿಂದ ಆದಾಯವನ್ನು ದ್ವಿಗುಣಗೊಳಿಸಲು ಸಾಧ್ಯವಾಯಿತು. |
ಜಲಚರ ಸಾಕಣೆ ಸಮುದಾಯಗಳನ್ನು ಬಲಪಡಿಸುವ SAFAL ನ ವಿಧಾನ
ತನ್ನ ಉಪಕ್ರಮಗಳನ್ನು ಉಳಿಸಿಕೊಳ್ಳಲು, SAFAL ಸುಸ್ಥಿರ ಜಲಚರ ಸಾಕಣೆ ಪದ್ಧತಿಗಳನ್ನು ಅಸ್ತಿತ್ವದಲ್ಲಿರುವ ಸರ್ಕಾರಿ ಯೋಜನೆಗಳು ಮತ್ತು ನೀತಿಗಳೊಂದಿಗೆ ಸಂಯೋಜಿಸುತ್ತದೆ. ಮೀನು ಉತ್ಪಾದನೆಯನ್ನು ಹೆಚ್ಚಿಸುವುದು, ಆಹಾರ ಮತ್ತು ಪೌಷ್ಟಿಕಾಂಶ ಭದ್ರತೆಯನ್ನು ಸುಧಾರಿಸುವುದು ಮತ್ತು ರೈತರ ಆದಾಯವನ್ನು ಹೆಚ್ಚಿಸುವುದು ಇದರ ಗುರಿಯಾಗಿದೆ. ಈ ಯೋಜನೆಯು ಸಹಯೋಗದ ಪ್ರಯತ್ನವಾಗಿದ್ದು, ಅಸ್ಸಾಂ ರಾಜ್ಯ ಗ್ರಾಮೀಣ ಜೀವನೋಪಾಯ ಮಿಷನ್, ಸ್ಥಳೀಯ ಸರ್ಕಾರೇತರ ಸಂಸ್ಥೆಗಳು (NGOಗಳು), ಶೈಕ್ಷಣಿಕ ಮತ್ತು ಈ ವಲಯದಲ್ಲಿನ ಇತರ ಪಾಲುದಾರರೊಂದಿಗೆ ಒಟ್ಟಾಗಿ ಕಾರ್ಯನಿರ್ವಹಿಸುತ್ತದೆ.
ಈ ಉಪಕ್ರಮದ ಪ್ರಮುಖ ಅಂಶವೆಂದರೆ 500 ಕ್ಕೂ ಹೆಚ್ಚು ಸಮುದಾಯ ಸಂಪನ್ಮೂಲ ವ್ಯಕ್ತಿಗಳಿಗೆ (CRP ಗಳು) ತರಬೇತಿ ನೀಡಿ ಅವರನ್ನು ಸಜ್ಜುಗೊಳಿಸುವುದು. ಇದಕ್ಕೆ 140 CRP-ತರಬೇತುದಾರರು ಬೆಂಬಲ ನೀಡುತ್ತಾರೆ. CRP ಗಳು ರೈತ ಉತ್ಪಾದಕ ಸಂಸ್ಥೆಗಳು ಮತ್ತು ಕಂಪನಿಗಳ (FPO/FPC ಗಳು), ಉತ್ಪಾದಕ ಗುಂಪುಗಳು (PG ಗಳು) ಮತ್ತು ಸ್ವ-ಸಹಾಯ ಗುಂಪುಗಳ (SHG ಗಳು) ಭಾಗವಾಗಿ ಸಮುದಾಯ-ಚಾಲಿತ ಮತ್ತು ಸುಸ್ಥಿರ ಜ್ಞಾನ ವರ್ಗಾವಣೆಯನ್ನು ಖಾತ್ರಿಗೊಳಿಸುತ್ತದೆ. FPO ಗಳು ರೈತರಿಗೆ ಸ್ಥಳೀಯ ಕೇಂದ್ರಗಳಾಗಿ ಕಾರ್ಯನಿರ್ವಹಿಸುತ್ತಾ, ತರಬೇತಿ ಮತ್ತು ಸಲಹಾ ಸೇವೆಗಳನ್ನು ನೀಡುತ್ತವೆ. ಅದರೊಟ್ಟಿಗೆ ಪರಸ್ಪರ ಕಲಿಕೆ ಮತ್ತು ಸಾಮೂಹಿಕ ಆರ್ಥಿಕ ಸಬಲೀಕರಣವನ್ನು ಬೆಳೆಸುತ್ತವೆ.
SAFAL ನ ವಿಧಾನದಲ್ಲಿ ಸಾಮರ್ಥ್ಯ ವೃದ್ಧಿಯು ಕೇಂದ್ರಬಿಂದುವಾಗಿದೆ. ಈ ಯೋಜನೆಯು ಪ್ರಾಯೋಗಿಕ ಕ್ಷೇತ್ರ ಪ್ರದರ್ಶನಗಳನ್ನು ತರಗತಿ ಅವಧಿಗಳೊಂದಿಗೆ ಸಂಯೋಜಿಸುವ ಪ್ರಾಯೋಗಿಕ ತರಬೇತಿ ಮಾದರಿಯನ್ನು ಅನುಸರಿಸುತ್ತದೆ. CRP ಗಳು ಮೀನು ಸಾಕಣೆ ತಂತ್ರಗಳ ಬಗ್ಗೆ ಮಾತ್ರವಲ್ಲದೆ ಯುವ ರೈತರಿಗೆ ಕಲಿಸುವ ಮತ್ತು ಅವರನ್ನು ಸಾಕಣೆಯಲ್ಲಿ ತೊಡಗಿಸುವ ಪರಿಣಾಮಕಾರಿ ಮಾರ್ಗಗಳ ಬಗ್ಗೆಯೂ ಜಲಚರ ಸಾಕಣೆ ತಜ್ಞರಿಂದ ವಿಶೇಷ ತರಬೇತಿಯನ್ನು ಪಡೆಯುತ್ತಾರೆ. ಪ್ರತಿ CRP 25 ರೈತರಿಗೆ ಎರಡು ಗಂಟೆಗಳ ಅವಧಿಗಳ ಮೂಲಕ ತರಬೇತಿ ನೀಡುತ್ತದೆ. ಇದನ್ನು ಕೃಷಿ ಋತುವಿನ ಉದ್ದಕ್ಕೂ ನಿಗದಿಪಡಿಸಬಹುದು. ಅವುಗಳನ್ನು ಅವರ ಕೃಷಿ ಮತ್ತು ಮನೆಯ ಜವಾಬ್ದಾರಿಗಳಿಗೆ ಹೊಂದಿಕೊಳ್ಳುವಂತೆ, ವಿಶೇಷವಾಗಿ ಮಹಿಳೆಯರು ಈ ತರಬೇತಿ ಪಡೆಯುವುದನ್ನು ಖಾತ್ರಿಗೊಳಿಸಿಕೊಳ್ಳಲು ವಿನ್ಯಾಸಗೊಳಿಸಲಾಗಿದೆ. ಈ ಅವಧಿಗಳು ಮೀನು ಸಾಕಣೆಯ ಪ್ರಮುಖ ಅಂಶಗಳನ್ನು ಒಳಗೊಂಡಿವೆ, ಅವುಗಳೆಂದರೆ ಪೂರ್ವ-ಸಂಗ್ರಹಣೆ, ನೈಸರ್ಗಿಕ ಆಹಾರ, ನೀರಿನ ಗುಣಮಟ್ಟ ನಿರ್ವಹಣೆ, ಸಂಗ್ರಹಣೆಯ ನಂತರದ ವಿಧಾನಗಳು ಮತ್ತು ಕೃಷಿ ಅರ್ಥಶಾಸ್ತ್ರದ ಮೂಲಭೂತ ಅಂಶಗಳು. ತಿಳಿವಳಿಕೆ ಮತ್ತು ಪ್ರಾಯೋಗಿಕ ಅನ್ವಯವನ್ನು ಹೆಚ್ಚಿಸಲು ರೈತ ಕೈಪಿಡಿಗಳು, ಫ್ಲಿಪ್‌ಬುಕ್‌ಗಳು, ಪೋಸ್ಟರ್‌ಗಳು ಮತ್ತು ಕೃಷಿ ದಾಖಲೆ ಪುಸ್ತಕಗಳಂತಹ ಕಲಿಕಾ ಸಾಮಗ್ರಿಗಳನ್ನು ತಜ್ಞರು, ಪಾಲುದಾರರು ಮತ್ತು ರೈತರು ಜಂಟಿಯಾಗಿ ರಚಿಸಿದ್ದಾರೆ.
ವೈಯಕ್ತಿಕ ತರಬೇತಿಗಳ ಹೊರತಾಗಿ, FPO/FPCಗಳು ಮತ್ತು SHGಗಳು ತಮ್ಮ ಕಾರ್ಯಾಚರಣೆ ಮತ್ತು ವ್ಯಾವಹಾರಿಕ ಸಾಮರ್ಥ್ಯಗಳನ್ನು ಹೆಚ್ಚಿಸುವ ಮೂಲಕ ಬಲವನ್ನು ಪಡೆದುಕೊಂಡವು. ಈ ಸಂಸ್ಥೆಗಳು ರೈತರು ಸಾಮೂಹಿಕ ನಿರ್ಧಾರ ತೆಗೆದುಕೊಳ್ಳುವ, ಮಾರುಕಟ್ಟೆ ಪ್ರವೇಶವನ್ನು ಸುಧಾರಿಸುವ ಮತ್ತು ಉತ್ತಮ ಅಭ್ಯಾಸಗಳನ್ನು ಹಂಚಿಕೊಳ್ಳುವ ವೇದಿಕೆಗಳಾಗಿ ಕಾರ್ಯನಿರ್ವಹಿಸುತ್ತವೆ. ಈ ರೈತ ಸಂಘಟನೆಗಳನ್ನು ಬಲಪಡಿಸುವ ಮೂಲಕ, ರೈತರು ತಮ್ಮ ವ್ಯಾಪಾರಿ ಶಕ್ತಿಯನ್ನು ಹೆಚ್ಚಿಸಿಕೊಂಡಿದ್ದಾರೆ. ಗುಣಮಟ್ಟದ ಒಳಸುರಿಗಳ ಲಭ್ಯತೆ ಮತ್ತು ಜ್ಞಾನ ವಿನಿಮಯಕ್ಕಾಗಿ ರಚನಾತ್ಮಕ ಸಾಧ್ಯತೆಗಳನ್ನು ಹೆಚ್ಚಿಸಿಕೊಂಡಿದ್ದಾರೆ.
FPOಗಳು/FPCಗಳು ಮತ್ತು CRPಗಳು ಹೊಸದಾಗಿ ಸ್ಥಾಪಿಸಲಾದ ಕ್ಲಸ್ಟರ್ ಮಾಹಿತಿ ಕೇಂದ್ರಗಳು ಮತ್ತು ಉಪಗ್ರಹ ಕೇಂದ್ರಗಳನ್ನು ಪೋಷಿಸುತ್ತವೆ. ಇವು ಗ್ರಾಮೀಣ ಪ್ರದೇಶಗಳಲ್ಲಿ ಕೃಷಿ ಪರಿಸರ ಕಿಯೋಸ್ಕ್‌ಗಳಾಗಿ ಕಾರ್ಯನಿರ್ವಹಿಸುತ್ತವೆ. ಸರ್ಕಾರಿ ಯೋಜನೆಗಳು ಮತ್ತು ಸುಸ್ಥಿರ ಜಲಚರ ಸಾಕಣೆ, ಉತ್ತಮ ಅಭ್ಯಾಸಗಳು ಮತ್ತು ತರಬೇತಿ ಸಾಮಗ್ರಿಗಳ ಮೂಲಕ ಹಣಕಾಸಿನ ಮಾಹಿತಿಯನ್ನು ಪಡೆಯಲು ಅವು ಕಂಪ್ಯೂಟರ್‌ಗಳು ಅಥವಾ ಸ್ಮಾರ್ಟ್‌ಫೋನ್‌ಗಳಂತಹ ತಂತ್ರಜ್ಞಾನಗಳೊಂದಿಗೆ ಸಜ್ಜುಗೊಂಡಿವೆ. ಈ ಕೇಂದ್ರಗಳು ಸ್ಥಳೀಯ ಜ್ಞಾನ ಪ್ರಸರಣವನ್ನು ಬಲಪಡಿಸುತ್ತವೆ, ರೈತರಿಗೆ ಮಾಹಿತಿಯುಕ್ತ ನಿರ್ಧಾರ ತೆಗೆದುಕೊಳ್ಳುವಿಕೆಯನ್ನು ಬೆಂಬಲಿಸುತ್ತವೆ ಮತ್ತು ಸಭೆಗಳು ಮತ್ತು ಸಂವಹನಗಳಿಗಾಗಿ ಸಮುದಾಯ ಕೇಂದ್ರಗಳಾಗಿ ಕಾರ್ಯನಿರ್ವಹಿಸುತ್ತವೆ.
ಸುಸ್ಥಿರ ಜಲಚರ ಸಾಕಣೆಯನ್ನು ಉತ್ತೇಜಿಸುವುದು SAFAL ನ ಮಧ್ಯಸ್ಥಿಕೆಗಳ ಮೂಲತತ್ವವಾಗಿದೆ. ಈ ಪದ್ಧತಿಗಳು ಪರಿಸರ ಸಮತೋಲನವನ್ನು ಖಚಿತಪಡಿಸುತ್ತವೆ. ಪರಿಸರ ಸಂರಕ್ಷಣೆಯನ್ನು ಬಲಪಡಿಸುತ್ತವೆ ಮತ್ತು ಸಮುದಾಯ-ಚಾಲಿತ ಸುಸ್ಥಿರ ಕೃಷಿ ರೂಪಾಂತರವನ್ನು ಖಚಿತಪಡಿಸುತ್ತವೆ. ಇದು ಭಾರತ ಮತ್ತು ಜರ್ಮನಿ ನಡುವಿನ ಹಸಿರು ಮತ್ತು ಸುಸ್ಥಿರ ಅಭಿವೃದ್ಧಿ ಪಾಲುದಾರಿಕೆ (GSDP) ಯ ಉದ್ದೇಶಗಳನ್ನು ಬೆಂಬಲಿಸುತ್ತದೆ.
ಪರಿಣಾಮ ಹಾಗೂ ಮುಂದಿನ ಹಾದಿ
ಇಂದಿನವರೆಗೆ, 7,000 ಕ್ಕೂ ಹೆಚ್ಚು ರೈತರು 500 ಕ್ಕೂ ಹೆಚ್ಚು CRP ಗಳ ಮೂಲಕ ತಾಂತ್ರಿಕ ತರಬೇತಿಯನ್ನು ಪಡೆದಿದ್ದಾರೆ. ಅವರು ತಮ್ಮ ಸಮುದಾಯಗಳಲ್ಲಿ ಮನೆ ಬಾಗಿಲಿಗೆ ಸೇವೆಯನ್ನು ತಲುಪಿಸುವ ಮೂಲಕ ಸಕ್ರಿಯವಾಗಿ ಬೆಂಬಲ ನೀಡುತ್ತಿದ್ದಾರೆ. ಸ್ವತಃ CRP ಆಗಿರುವ ಸೋನ್ಮೋನಿ ದೇವಿ (ಬಾಕ್ಸ್ 1 ನೋಡಿ) ಯಂತಹ ರೈತರಿಗೆ, SAFAL ಯೋಜನೆಯು ಕೇವಲ ಗಳಿಕೆಯನ್ನು ಹೆಚ್ಚಿಸುವ ಅವಕಾಶಕ್ಕಿಂತ ಹೆಚ್ಚಿನದನ್ನು ಪ್ರತಿನಿಧಿಸುತ್ತದೆ - ಇದು ಸ್ಥಿತಿಸ್ಥಾಪಕತ್ವ ಮತ್ತು ಸ್ವಾವಲಂಬನೆಯ ಮಾರ್ಗವಾಗಿದೆ. "CRP ತರಬೇತಿಯನ್ನು ಪಡೆಯುವುದು ಜೀವನವನ್ನು ಬದಲಾಯಿಸುವ ಅನುಭವವಾಗಿತ್ತು. ಮಹಿಳಾ ಸಬಲೀಕರಣವನ್ನು ಮುನ್ನಡೆಸುವುದರ ಜೊತೆಗೆ ಸಮುದಾಯದಲ್ಲಿ ಸ್ವಾಧೀನಪಡಿಸಿಕೊಂಡ ಜ್ಞಾನವನ್ನು ಪ್ರಸಾರ ಮಾಡುವ ಮೂಲಕ ಮನ್ನಣೆಯನ್ನು ಗಳಿಸಲು ಅನುವು ಮಾಡಿಕೊಟ್ಟಿತು," ಎಂದು ಅವರು ಹೇಳುತ್ತಾರೆ.
SAFAL ನ ಮಾದರಿಯನ್ನು ಇತರ ಭಾರತೀಯ ರಾಜ್ಯಗಳಲ್ಲಿಯೂ ಪುನರಾವರ್ತಿಸಬಹುದು, ಇದು ಜಲಚರ ಸಾಕಣೆ ಸಮುದಾಯಗಳ ಸ್ಥಿತಿಸ್ಥಾಪಕತ್ವವನ್ನು ಬಲಪಡಿಸುತ್ತದೆ. ಈ ಯೋಜನೆಯು ಉದ್ದೇಶಿತ ತಳಮಟ್ಟದ ಸಾಮರ್ಥ್ಯ ನಿರ್ಮಾಣ ಉಪಕ್ರಮಗಳು ಶಾಶ್ವತ ಬದಲಾವಣೆಯನ್ನು ಸೃಷ್ಟಿಸುವುದು, ಆಹಾರ ಮತ್ತು ಪೌಷ್ಟಿಕಾಂಶ ಭದ್ರತೆಯನ್ನು ಸುಧಾರಿಸುವುದು ಮತ್ತು ಮುಂದಿನ ಪೀಳಿಗೆಗೆ ಜೀವನೋಪಾಯವನ್ನು ಹೇಗೆ ಸಾಧಿಸುತ್ತವೆ ಎಂಬುದನ್ನು ವಿವರಿಸುತ್ತದೆ.
Bettina Renner
Monitoring and Evaluation,
Public Relations Jr. Specialist
E-mail: E bettina.renner@giz.de
Pratap Sinha
Project Leader, SAFAL
GIZ Regional Office, Guwahati
House no-54(a), Bonful Path
Guwahati-781038
Assam
http://www.giz.de
ಆಂಗ್ಲ ಮೂಲ : ಲೀಸಾ ಇಂಡಿಯಾ; ಸಂಪುಟ :೨೭; ಸಂಚಿಕೆ : ೧ ; ಮಾರ್ಚ್‌ ೨೦೨೫
